G‘uzor tumani hokimining 8-mart — Xalqaro xotin-qizlar kuni munosabati bilan bayram tabrigi
Assalomu alaykum, aziz ayollar, muhtarama onaxonlar, qadrli opa-singillar!
Avvalo, Siz, azizlarni, Sizlarning timsolingizda butun tumanimiz xotin-qizlarini 8-mart bayrami bilan chin qalbimdan muborakbod etaman. Barchangizga o‘zimning yuksak hurmatim va ezgu tilaklarimni bildiraman.
Biz sizlarni eng avvalo fidoyilik timsoli deb bilamiz. Mehridaryo qalbingiz, aql-zakovatingiz, sevgi va sadoqatingiz uchun sizlardan bir umr qarzdormiz.
Ayollarimiz davlat boshqaruvi va vakillik organlarida, ishlab chiqarish, tadbirkorlik, fermerlik, sog‘liqni saqlash, taʼlim, maʼrifat, madaniyat va boshqa sohalarda samarali mehnat qilishmoqda.
Vatanimiz va xalqimiz oldidagi munosib xizmatlari uchun tumanimiz ayollari ham davlat mukofotiga sazovor bo‘lishgan.
Xususan, joriy yilda 8-mart xotin-qizlar bayrami arafasida Gʻuzor tumanidagi "G‘uzor qorako‘lchilik" MCHJ bosh cho‘poni Xurramova Salima Jo‘rayevna «Shuhrat» medali bilan mukofotlangan bo‘lsa, G‘uzor tumanida pillachilik sohasida ko‘p yillik samarali mehnat qilib kelayotgan Ro‘zigul Jo‘rayeva "Moʻtabar ayol" hamda tumandagi "Sumbula" o‘quv markazi rahbari Dilafruz Muhammadiyeva "Eng faol tadbirkor ayol" ko‘krak nishoniga sazovor bo‘ldi.
Umuman olganda, davlatimiz rahbari qanday islohotlarni hayotga joriy etmasin avvalo munis onalarimiz, mehribon opa-singillarimiz siymosi, ularning dardu tashvishlari turadi.
Hurmatli onaxon, opa-singillar va munis qizlar!
Yana bir bor Sizlarni Xalqaro xotin-qizlar bayrami bilan chin qalbimdan tabriklayman.
Barchangizga oilaviy xotirjamlik, xonadonlaringizga tinchlik, fayzu baraka tilayman.
Doimo xalqimizning yuksak mehri va ardog‘ida bo‘lish hammangizga nasib etsin!
Bayramingiz muborak bo‘lsin!
Bekzod Suyunov, G'uzor tumani hokimi.